ВМРО-ДПМНЕ реагира на критиките од СДС за откупот на пиперките, обвинувајќи ја опозициската партија за лицемерие и политичко мешање во проблемите со откупот.
Од партијата велат дека земјоделците што се соочуваат со проблеми при откупот добро знаат дека меѓу поголемите откупувачи е „Мамас ајвар“, компанија која, според нив, е во сопственост на поранешниот премиер Зоран Заев.
„Лицемерно е што СДС се вмешува во политичка борба и пресметка за откупот на пиперките“, наведуваат од ВМРО-ДПМНЕ.
Од партијата поставуваат и прашање дали, како што велат, постои политичко замешателство во одржувањето на ниски откупни цени со цел СДС да има политички бенефит.
ВМРО-ДПМНЕ му порача на СДС, наместо барањата за откупот на пиперката да ги упатува кон Владата, да ги насочи кон најголемиот откупувач, „Мамас ајвар“, и Зоран Заев.
„Прашањето што е непознато е од каде Зоран Заев диктира цени, од Порто Карас или од Санторини?“, стои во партиската реакција.
Од ВМРО-ДПМНЕ дополнително обвинуваат дека СДС, Зоран Заев и Венко Филипче, како што наведуваат, не се радуваат на успесите на Македонија.
