Од политичката партија Левица преку соопштение остро го критикуваа предлог-законот за студентски стандард, оценувајќи дека наместо да ги решава долгогодишните проблеми со кои се соочуваат студентите, тој воведува построги дисциплински мерки и остава простор за, како што велат, самоволие при неговата примена.
Според Левица, предложените законски измени не нудат решенија за прашања како што се распределбата на местата во студентските домови, недостигот на сместувачки капацитети, дигитализацијата и подобрувањето на студентскиот стандард, туку ставаат акцент на санкциите.
Од партијата посочуваат дека со новите одредби забраната за користење студентски дом би можела да трае од една до пет години и да важи за сите студентски домови во државата, наместо само за домот во кој е сторена повредата. Според нив, на тој начин еден студент би можел да остане без можност за сместување во текот на речиси целото студирање.
Левица смета дека во предложениот закон под исти санкции се ставаат различни прекршоци, при што, според нив, не се прави соодветна разлика меѓу потешки дела, како насилство или намерно уништување имот, и полесни прекршоци, како внесување алкохол, непријавување дефект или нарушување на куќниот ред.
Во реакцијата се критикува и новиот систем на бодирање за прием во студентските домови. Од Левица наведуваат дека постојат неусогласености меѓу одредбите што се однесуваат на приходот по член на семејството и критериумите за покривање на трошоците за сместување и исхрана, како и дека дел од социјално ранливите категории би можеле да останат надвор од предвидените квоти поради технички недоследности.
Партијата, исто така, забележува дека во законот не се прецизирани клучните критериуми за бодирањето, оставајќи, како што тврдат, значителен простор тие да се уредуваат со подзаконски акти.
Од Левица оценуваат дека закон кој го уредува студентскиот стандард треба да опфати поширок спектар на прашања, меѓу кои стипендии, студентски превоз, домување, квалитетна исхрана, здравствена и психолошка поддршка, како и мерки за подобрување на условите за студентите од социјално ранливите категории.
