Просечните каматни стапки на кредитите во банките и штедилниците продолжиле да се намалуваат и во јуни годинава, додека каматите на депозитите останале речиси непроменети, покажуваат најновите податоци на Народната банка.
Во јуни 2026 година, просечната каматна стапка на вкупните кредити изнесувала 4,67 проценти, што претставува намалување од 0,02 процентни поени во однос на мај и 0,36 процентни поени во споредба со истиот месец лани. Просечната каматна стапка на вкупните депозити останала на ниво од 2,17 проценти, што е за 0,03 процентни поени пониско на годишно ниво.
Кај новоодобрените кредити, просечната каматна стапка изнесувала 4,38 проценти, со месечно и годишно намалување од 0,04 процентни поени. Од друга страна, новопримените депозити бележат раст, при што просечната каматна стапка достигнала 2,54 проценти, што е повисоко за 0,33 процентни поени на месечно и за 0,19 процентни поени на годишно ниво.
Кај корпоративниот сектор, просечната каматна стапка на вкупните кредити се намалила на 4,31 проценти, додека кај новоодобрените кредити е регистриран благ раст на 4,25 проценти. Просечната каматна стапка на депозитите на компаниите изнесувала 2,66 проценти, а кај новопримените депозити пораснала на 2,20 проценти.
За домаќинствата, просечната каматна стапка на вкупните кредити се намалила на 5,02 проценти, што е за 0,42 процентни поени помалку во споредба со лани. Кај новоодобрените кредити е забележан благ месечен раст, при што каматната стапка достигнала 4,71 процент.
Просечната каматна стапка на депозитите на домаќинствата изнесувала 2,10 проценти, додека кај новопримените депозити се зголемила на 2,74 проценти, што претставува раст и на месечно и на годишно ниво.
Од Народната банка посочуваат дека движењата кај каматните стапки и натаму ги одразуваат условите на финансискиот пазар и политиките на банките во кредитирањето и прибирањето депозити.
