Во мај: Годишен раст од 8,6% на вкупните депозити и од 13,4% на вкупната кредитна поддршка

Банкарскиот сектор во земјава продолжува да бележи раст и кај штедењето и кај кредитирањето, покажуваат најновите податоци за монетарните движења во мај 2026 година.

Според Народната банка, паричната маса (М3) во мај е зголемена за 0,8 проценти на месечно ниво, а на годишна основа бележи раст од 8,6 проценти. Најголем придонес за овој раст имаат готовите пари во оптек, депозитните пари и депозитите со подолг рок на доспевање.

— реклама —

Вкупните депозити во мај се повисоки за 0,8 проценти во споредба со претходниот месец, главно поради зголемените депозити на компаниите. На годишно ниво, депозитите пораснале за 8,6 проценти, при што најголем придонес има секторот домаќинства.

Во истиот период, вкупните кредити бележат месечен раст од 1,2 проценти и годишен раст од 13,4 проценти. Растот е забележан и кај компаниите и кај граѓаните, при што поголем придонес на годишно ниво има корпоративниот сектор.

— реклама —

Депозитите на компаниите во мај се зголемени за 2,5 проценти на месечно ниво, додека на годишна основа растот изнесува 5,8 проценти. Во исто време, кредитите на корпоративниот сектор се повисоки за 0,9 проценти во однос на април и за 15 проценти споредено со мај минатата година.

— реклама —

Кај домаќинствата, депозитите останале речиси непроменети во текот на мај, но на годишно ниво бележат раст од 9,7 проценти. Истовремено, кредитите на граѓаните се зголемени за 1,3 проценти на месечно и за 12 проценти на годишно ниво.

Најголем раст и натаму има кај станбените и потрошувачките кредити. Станбените кредити во мај се зголемени за 1,4 проценти во однос на претходниот месец и за 16,3 проценти на годишно ниво, додека потрошувачките кредити бележат месечен раст од 1,1 процент и годишен раст од 11,2 проценти.

Пораст е регистриран и кај автомобилските кредити, додека кредитите преку кредитни картички имаат благ месечен раст, но остануваат пониски во споредба со лани.

Податоците укажуваат дека и граѓаните и компаниите продолжуваат активно да ги користат банкарските услуги, додека кредитната активност останува еден од главните двигатели на финансиските текови во економијата.