Поранешниот претседател на Градската организација на СДСМ, Васко Кичевски, преку објава на социјалните мрежи реагираше по случајот со поранешниот директор на Царинската управа, Стефан Богоев, оценувајќи дека станува збор за неправда и селективен пристап во правосудството.
„Како и по обичај, во Македонија во затвор се оди за украдени ќебапчиња, но не се оди ако украдеш стотици милиони. Не се оди ако труеш народ со хемиски супстанции кои се строго забранети. Не се оди ако труеш народ со палмино масло. Не се оди ако шверцуваш пет тони марихуана“, напиша Кичевски.
Тој изрази жалење што, како што наведе, Богоев ќе мора да ја почувствува неправдата на сопствен грб и да помине период одвоен од своето семејство.
„Жал ми е што Богоев ќе мора на свој грб да ја почувствува неправдата и да изгуби месеци од својот живот, раздвоен од фамилијата, а на крај сите ќе ја разберат вистината, кога ќе излезе дека од целиот случај нема ништо“, порача Кичевски.
Неговата реакција доаѓа откако беше отворен предмет во кој Богоев е осомничен за злоупотреби поврзани со јавна набавка во Царинската управа. Од СДСМ претходно оценија дека станува збор за политички мотивиран случај, додека надлежните институции најавија целосно расчистување на наводите.
