Вкупно 26 пожари на отворен простор се регистрирани во периодот од 31 август до 1 септември до 7:30 часот, соопшти Центарот за управување со кризи. Од нив, 20 се изгаснати, четири се ставени под контрола, а два пожара и натаму се активни.
Активни се пожарите во Општина Сарај, на потегот меѓу селата Копаница и Радуша, каде што гори нискостеблеста шума и ниска вегетација, како и во Општина Штип, на просторот меѓу селата Селце, Пухче, Степанци и Лакавица, каде што е зафатена ниска вегетација.
Под контрола се пожарите кај селата Битово, Заград и Страјане во Општина Македонски Брод, на градската депонија Острец во Делчево, во село Драгов Дол во Македонски Брод и над село Палиград во Општина Зелениково.
Во текот на изминатото деноноќие се изгаснати пожари и на повеќе локации во Гази Баба, Врапчиште, Кичево, Ресен, Прилеп, Долнени, Струга, Чашка, Ново Село, Старо Нагоричане, Боговиње, Желино, Кавадарци и Свети Николе.
