Нови детали за безбедносните пропусти во дискотеката „Пулс“ беа изнесени денеска во Основниот кривичен суд во Идризово, каде што продолжи судењето за трагичниот пожар во Кочани. Во судницата беа распрашувани вешти лица од тимот кој го изработил градежното вештачење, а најголем дел од прашањата беа упатени од одбраната на првообвинетиот Дејан Јованов, сопственик на дискотеката.
Вештото лице Викторија Будимовска Секуловска посочи дека, според сознанијата со кои располагале при изработката на вештачењето, од 2012 до 2025 година во објектот немало извршено инспекциска контрола од инспектор за противпожарна заштита.
Таа откри и дека во внатрешноста на дискотеката бил поставен само еден план за евакуација, додека главната влезно-излезна врата не ги исполнувала условите за противпожарна врата.
„Паник-рачката, системот за кочење во отворена положба, како и потребната огноотпорност – ниту еден од овие услови не бил исполнет“, рече Будимовска Секуловска.
Пред судот сведочеше и вештото лице Маријана Лазаревска, која одговараше на вкрстени прашања на адвокатката на Јованов во врска со градежните интервенции во објектот, неговата пренамена и материјалите употребени во дискотеката.
Лазаревска нагласи дека утврдувањето на причината за избувнувањето на пожарот не било задача на градежното вештачење, но анализата укажала на можната поврзаност меѓу прскалките и сунѓерестиот материјал поставен во објектот.
Таа посочи дека материјалот можел лесно да се запали и да придонесе за брзо ширење на огнот.
Во текот на вкрстеното испрашување, дел од прашањата се однесуваа и на бојата на сунѓерестиот материјал. Лазаревска реагираше дека одбраната повторно поставува прашања на кои, како што рече, веќе било одговорено во вештачењата.
„Повторно селективно читате прописи, поставувате трипати одговорени и елаборирани прашања, од вештачењата гледате сунѓери по боја, а не читате за составот на полиуретанскиот сунѓер што сме го утврдиле“, рече Лазаревска.
Во расправата се вклучи и професорот Горан Марковски, член на тимот кој го изработил градежното вештачење. Тој посочи дека заклучоците за материјалите поставени на таванот биле донесени врз основа на форензичките вештачења, како и на наодите од Институтот за судска медицина и Природно-математичкиот факултет.
„Специфично за овој материјал, конкретно сунѓерот, е што при согорување тој ослободува јаглерод моноксид и цијанид“, посочи Марковски, говорејќи за опасноста од продуктите при согорување на материјалот.
Лазаревска објасни дека при проектирањето на објектите не се поаѓа од тоа дали и кога ќе избувне пожар, туку од претпоставката дека пожар може да се случи, поради што објектот мора да биде проектиран така што ќе обезбеди безбедност во такви услови.
„Не можеме секогаш да влијаеме на причината за пожарот, но можеме да влијаеме на тоа објектот да биде безбеден кога ќе настане пожар“, посочи таа.
Во текот на расправата било отворено и прашањето за електричната инсталација. Судијката Дијана Груевска-Илиевска посочила дека ова прашање веќе било разгледувано од вештите лица и дека со пренамената на објектот во кабаре и дискотека се појавила потреба од дополнително осветлување, а со тоа и од интервенции и зголемување на електричната инсталација.
Одбраната има право да ги испрашува вештите лица, а судијката во текот на расправата повеќепати укажувала дека дел од прашањата веќе биле одговорени.
Во судницата присуствуваа и роднини на жртвите, кои бурно реагираа на должината на испрашувањето и повторното отворање на прашања за кои, според нив, веќе биле изнесени одговори.
Со изведувањето на градежното вештачење, изработено од тим од Градежниот факултет при УКИМ, и распитот на вештите лица, се очекува да заврши доказната постапка предложена од Обвинителството. Потоа доказите пред судот треба да започне да ги изведува одбраната.
Пожарот во дискотеката „Пулс“ во Кочани избувна на 16 март 2025 година. Во трагедијата загинаа 63 лица, а повеќе од 200 беа повредени.
