Вицепремиерот и министер за транспорт Александар Николоски денеска престојуваше во работна посета на Општина Тетово, каде заедно со градоначалникот Биљал Касами и заменик-министерката за транспорт Калтрина Зеколи Шаќири изврши увид во реконструираната улица „Штипска“.
При посетата, Николоски оцени дека Тетово бележи значителен инфраструктурен развој и ја пофали реализацијата на проектите што се спроведуваат во соработка меѓу Владата и локалната самоуправа.
„Секогаш е задоволство кога се гледаат успешно завршени проекти. Ова е една од најквалитетно реконструираните улици што сум ги видел низ државата. Му честитам на градоначалникот за сработеното. Тетово доживува вистински инфраструктурен бум и тоа заслужува поддршка“, изјави Николоски.
Тој посочи дека реконструкцијата на улицата е дел од проект што се реализира во соработка со Светската банка и Општина Тетово, додавајќи дека преку програмите на Министерството за транспорт во општината се реализираат инфраструктурни проекти во вредност од 428 милиони денари.
Според Николоски, досегашната успешна реализација е причина Владата да продолжи со поддршката за нови инвестиции во Тетово.
Заменик-министерката Калтрина Зеколи Шаќири истакна дека за две години се обезбедени повеќе од седум милиони евра за реализација на 29 инфраструктурни проекти во општината.
„Овие инвестиции ја потврдуваат нашата определба за подобрување на инфраструктурата, поквалитетни услови за живот на граѓаните и рамномерен развој на сите делови од општината. Продолжуваме со истата динамика и со реализација на останатите проекти“, нагласи Зеколи Шаќири.
