СДСМ преку соопштение обвини дека во уште четири села во Струмичко е забранета водата за пиење, откако Агенцијата за храна и ветеринарство, според партијата, ја прогласила водата за небезбедна во Рич, Попчево, Белотино и Вељуса.
Од СДСМ тврдат дека во водата нема резидуален хлор, а се присутни бактерии што, според нив, се показатели за фекално загадување. Партијата наведува дека водата не треба да се користи ниту за пиење ниту за подготовка на храна.
„Ова веќе не е инцидент. Ова е реалната слика во државата“, наведува СДСМ.
Од партијата обвинуваат дека повеќе од 50 места во државата, според нивните наводи, немаат безбедна вода за пиење. Воедно, СДСМ повторно го отвора прашањето со водоснабдувањето во Гостивар, наведувајќи дека 11 недели нема целосен, јавно објавен и потпишан извештај со кој би се потврдило дека водата е безбедна за пиење.
Партијата тврди и дека повеќе од еден месец постои загадување на реките Лепенец и Вардар, при што бара да се утврди кој е одговорен за загадувањето.
СДСМ го обвини министерот за здравство Сашо Клековски и Владата предводена од Христијан Мицкоски дека не обезбедуваат доволно информации за состојбата со водата и дека извештаите треба да бидат јавно достапни.
„Обезбедувањето безбедна вода за пиење е прва и основна обврска на една држава“, наведуваат од СДСМ, додавајќи дека граѓаните наместо институционални одговори се принудени да купуваат вода во пластични шишиња.
Од опозициската партија побараа јавно да бидат објавени извештаите за состојбата со водата во Гостивар, Вардар, Лепенец и Струмичкиот регион, како и да се утврди и соопшти кои се причинителите на загадувањата.
СДСМ бара одговорност и од надлежните доколку, како што тврдат од партијата, информациите за состојбата со водата се сокриваат од јавноста.
