Во Основниот кривичен суд Скопје денеска продолжи постапката против 25-годишниот Фатон Љури, обвинет дека на 1 јули, управувајќи мотор „Кавасаки“ без возачка дозвола по пешачката патека на кејот на Вардар, го прегазил 68-годишниот Југослав Николовски и го напуштил местото на несреќата.
Јавната обвинителка побара од Судот да ги одбие доказите што ги предложи одбраната, нагласувајќи дека тие не се релевантни за определување на санкцијата. Таа истакна дека личните и семејните прилики на обвинетиот не се спорни, но не можат да влијаат врз утврдувањето на тежината на делото, ниту врз фактичката состојба која е веќе јасно утврдена по неговото признание на вина.
Според обвинителството, психијатриското вештачење за партнерката на обвинетиот е ирелевантно, а дополнителното сообраќајно вештачење се обидува да сугерира поинакви околности од веќе утврдените.
Адвокатот Гоце Ристески, бранител на Љури, истакна дека доказите се поднесени исклучиво за да влијаат на висината на казната и дека се однесуваат на одговорноста, семејните и имотно-правните прилики на обвинетиот.
По расправата, Судот делумно го прифати барањето на обвинителството: дел од доказите на одбраната беа прифатени, а други – меѓу кои и техничкиот извештај – одбиени. Судот ќе се произнесе за нивната важност во пресудата.
Пред Судот сведочеше и сопругата на починатиот, Јасминка Николовска, која опиша дека трагедијата оставила тешки последици врз семејството, особено поради фактот дека истиот ден кога се случила несреќата дознале дека нивната ќерка е бремена.
По рочиштето, изјава даде и ќерката на Николовски, Маја Бошковска, која порача дека семејството очекува најстрога санкција за, како што рече, „безобѕирното и опасно управување“.
Фатон Љури е обвинет за тешки дела против безбедноста во сообраќајот и за неукажување помош на повредено лице.
Судењето продолжува.
