Коалицијата ВРЕДИ најавува дека на 9 мај, на Денот на Европа, ќе одржи конгрес на кој пет политички субјекти ќе се обединат во една партија, со заедничко име, насока и политичка мисија.
Од ВРЕДИ во соопштението велат дека обединувањето претставува зрел политички процес, преку кој досегашната соработка ќе прерасне во единствена политичка сила. Како клучни принципи ги посочуваат владеењето на правото, борбата против корупцијата, независното судство, евроинтеграциите, партнерството со НАТО и заштитата на семејството, традицијата и културниот идентитет.
На конгресот се очекува учество на околу 850 делегати, кои треба формално да ја потврдат новата организациска структура и политичка насока. Од коалицијата нагласуваат дека процесот означува премин од координација кон целосно обединување и, како што наведуваат, исполнување на ветувањата дадени пред албанските гласачи.
Во соопштението се посочува и дека обединувањето предизвикува реакции кај политичките противници, оценувајќи дека ваквиот чекор ќе ја засили нивната позиција на политичката сцена.
