Американскиот претседател Доналд Трамп дополнително ја разјасни временската рамка што ѝ ја постави на Иран за повторно отворање на Ормускиот теснец, нагласувајќи дека рокот истекува во вторник во 20:00 часот по источноамериканско време, што одговара на 2:00 часот по наше време.
„Вторник, 20:00 часот по источноамериканско време!“, напиша Трамп во новата објава на социјалните мрежи. Тој претходно се закани дека доколку Иран не го отвори клучниот пловен пат до тогаш, САД ќе ја гаѓаат критичната инфраструктура во земјата.
Во дополнителната реторика, Трамп посочи дека утре би можел да биде „ден на електрани и мостови“, алудирајќи на потенцијални напади врз енергетската и сообраќајната инфраструктура на Иран.
Ова е најновата од серијата закани што американскиот претседател му ги упатува на Техеран откако САД и Израел започнаа заеднички напади врз Иран, по што Техеран практично го затвори Ормускиот теснец.
И покрај острата реторика, Трамп истовремено остави можност за постигнување договор. Во разговор за Fox News, тој рече дека постои „добра шанса“ Иран да постигне договор веќе до утре и додаде дека Техеран „во моментов преговара“.
Ормускиот теснец е една од најважните светски поморски рути, низ која минува околу една петтина од глобалната трговија со нафта, а неговата блокада предизвикува сериозни нарушувања на енергетските пазари.
