„Вучиќ, светот гледа!“ – европратеничка предупредува на можно насилство по изборите во Србија

Словенечката европратеничка Ирена Јовева упати остро предупредување до Александар Вучиќ по затворањето на избирачките места во Србија, наведувајќи дека се зголемува бројот на предупредувања за можно насилство организирано од Српската напредна странка (СНС), како и пријавите за изборни неправилности.

— реклама —

Во објава на социјалната мрежа Икс, Јовева порача дека меѓународната јавност внимателно ги следи случувањата во Србија и предупреди дека дипломатската воздржаност не треба да се толкува како подготвеност да се игнорираат евентуални злоупотреби.

„Како што се затвораат избирачките места во Србија, се множат предупредувањата за можно насилство организирано од СНС, заедно со извештаите за изборни неправилности. Александар Вучиќ, светот гледа. Не мешај ја дипломатската воздржаност со подготвеноста да се замижи пред она што се случува. Не повеќе. Без закани. Без насилници. Без неказнивост“, напиша Јовева.

— реклама —

Нејзината реакција следува по изборен ден во кој од повеќе места во Србија пристигнуваа информации за инциденти и сомнежи за неправилности при гласањето.

— реклама —

Претходно и шефот на Делегацијата на Европската Унија во Србија, Андреас фон Бекерат, изрази длабока загриженост поради пријавените насилни инциденти на повеќе избирачки места.

Избирачките места во Србија се затворија во 20 часот, а според процените на ЦеСИД и Ипсос, излезноста до 19 часот достигна 67,6 проценти, значително повеќе отколку на парламентарните избори во 2023 година.

Првите процени за изборните резултати се очекуваат по 21:30 часот.