Претседателот на Србија, Александар Вучиќ, изјави дека укинувањето на американските царини за Србија е добра вест за секој граѓанин и оцени дека земјата ги исполнила критериумите на САД за донесување на таквата одлука.
Тој повтори дека Србија ги исполнила четирите критериуми што ги поставиле САД – односно прашањата поврзани со принудната работа, неповолните трговски практики, фармацевтската индустрија и цените на лековите, како и дигиталните такси и даноци.
„Тоа не се случи случајно. За тоа е заслужна државата Србија и многу сум среќен што успеавме во тоа“, изјави Вучиќ.
Тој додаде дека во иднина е можно да има нови царини од 10 или 12 отсто, но дека во моментов такви давачки не постојат.
„Можеби ќе дојдат денес, можеби за шест месеци, можеби подоцна. Сепак, тоа е многу помалку од 35 отсто, а засега такви царини нема“, рече српскиот претседател.
Вучиќ оцени дека одлуката на САД е голема и добра вест за граѓаните на Србија, но додаде дека му е жал што, како што рече, некои луѓе не се радуваат на успесите на земјата.
„Србија се сака секогаш и во секој момент. Не може да се оди против Србија само затоа што тоа носи политичка корист или затоа што се напаѓа политички противник“, порача Вучиќ.
