Израел издаде наредби за евакуација на девет населени места во јужен Либан, по што илјадници луѓе започнаа да ги напуштаат своите домови во страв од нови воени операции. Според локални извори, во денешните израелски напади загинале шест лица, само еден ден откако Хезболах го одби предложениот договор за прекин на огнот.
Меѓу луѓето кои бегаат се и стотици семејства од селото Анкун, кое во изминатиот период било засолниште за илјадници раселени лица од другите делови на јужен Либан.
Израелската армија соопшти дека наскоро ќе дејствува против цели на Хезболах во областа и им нареди на жителите веднаш да го напуштат регионот. Патиштата кон градот Сидон се преполни со возила, додека семејствата бараат побезбедни локации.
Во текот на денот израелските сили извршија повеќе воздушни напади во јужен Либан. Напади со беспилотни летала биле регистрирани во областа Набатија, додека авијацијата и артилеријата дејствувале врз градот Кфар Тебнит.
Израелскиот премиер Бенјамин Нетанјаху нареди продлабочување на офанзивата откако израелските сили претходно ја презедоа контролата врз средновековната тврдина Бофор, стратешка точка во регионот.
Од друга страна, Хезболах соопшти дека возвратил со ракетни напади врз израелските сили во близина на тврдината. Судирите следуваат по пропаѓањето на иницијативата за примирје, која беше посредувана од САД и поддржана од либанската влада.
Либанскиот премиер Наваф Салам изјави дека земјата повеќе не смее да биде поле за туѓи конфликти.
„Либан повеќе не може да биде полигон за туѓи војни, а југот на земјата и неговите жители не можат повеќе да ја плаќаат цената за одлуки што не ги донеле“, порача Салам.
Во меѓувреме, Израел и Либан водат одвоени разговори во Вашингтон со цел да се постигне прекин на огнот, но аналитичарите оценуваат дека шансите за успех се ограничени без директна согласност од Хезболах.
Според последните податоци, од почетокот на конфликтот, во израелските напади во Либан загинале повеќе од 3.500 луѓе. Во исто време, Хезболах со своите напади усмртил најмалку 29 израелски војници и тројца израелски цивили.
