Хрватска порача дека решавањето на сите отворени билатерални прашања со Црна Гора е неопходен предуслов Подгорица успешно да ги заврши пристапните преговори со Европската Унија.
Од хрватското Министерство за надворешни работи соопштија дека ставовите на Загреб се јасни и дека очекуваат решенија за повеќе прашања, меѓу кои се обештетување на поранешните затвореници во логорите, продолжување на потрагата по 14 исчезнати лица од периодот на Војната за независност, како и процесуирање на одговорните за воени злосторства.
Како дел од нерешените прашања, Хрватска ги посочува и имотните барања на хрватските семејства кои останале без имот во Црна Гора, зачувувањето на спомен-обележјето на местото на поранешниот логор Морин, продолжувањето на разговорите за разграничувањето на море и враќањето на школскиот брод „Јадран“.
Од Министерството апелираат црногорските власти во преостанатите месеци до крајот на 2026 година да се вклучат во конструктивен дијалог и да ја забрзаат работата на овие прашања.
Во соопштението се наведува дека Европската Унија јасно ставила до знаење дека не сака билатералните спорови да станат дел од процесот на проширување, поради што тие треба да бидат решени навреме за да не претставуваат пречка за пристапниот процес.
Хрватска потсетува дека добрососедските односи се еден од клучните политички критериуми за членство во ЕУ и дека овој принцип е вграден во преговарачката рамка на Црна Гора и на другите земји-кандидатки.
Црна Гора досега привремено затвори 18 од вкупно 33 преговарачки поглавја и останува најнапредната земја-кандидат за членство во Европската Унија. Европската Унија веќе го одобри почетокот на подготовката на нацрт-договорот за пристапување, а Европската комисија усвои финансиска рамка вредна речиси 3,2 милијарди евра, врз основа на очекувањата дека земјата би можела да стане полноправна членка во 2028 година.
