Заменик-претседателот на Владата и министер за транспорт Александар Николоски изјави дека Владата во изминатите две години обезбедила 350 милиони евра за развојни и инфраструктурни проекти во општините, оценувајќи дека ваква поддршка за локалната самоуправа досега немало.
На средба во ЗЕЛС со градоначалници и претставници на Светска банка, Николоски посочи дека преку проектот за изградба и рехабилитација на локални улици, кој се реализира во соработка со Светска банка, во периодот од јуни 2024 до јуни 2026 година се инвестирани над 25 милиони евра.
Според него, досега се реконструирани 96 улици во 72 општини, во вкупна должина од 72 километри, додека дополнителни 31 километар се во фаза на изградба и реконструкција.
„Ова јасно покажува дека Владата е силно посветена на урбаниот развој на општините и подобрувањето на условите за живот на граѓаните. Со поддршка од Светска банка и преку владините програми продолжуваме со реализација на капитални проекти низ целата држава“, истакна Николоски.
Тој додаде дека соработката со Светска банка е одлична и дека целта е да се реализираат уште повеќе проекти кои ќе придонесат за развој на локалната инфраструктура и подобри услуги за граѓаните.
