Бројот на пациенти со цистична фиброза кои ја добиваат терапијата во Македонија пораснал од три случаи во 2021 година на 126 во 2026 година, истакна министерот за здравство Сашо Клековски.
„Од почетните напори за дијагностицирање и генетска дијагностика пред девет години, до првото воведување на терапијата во 2021 година со три случаи, стигнавме до 126 во 2026 година“, рече Клековски.
Тој посочи дека сега се вклучени сите медицински оправдани случаи од двегодишна возраст нагоре. Претходно терапијата се применувала кај пациенти од 12 години нагоре, со исклучок на критични случаи под оваа возраст.
Како новина ја посочи и можноста за третман на пациенти со различни генетски мутации кои претходно не биле опфатени со терапија.
Клековски нагласи дека напредокот не се однесува само на терапијата, туку и на стручноста во третманот, при што ја истакна работата на Клиниката во Козле и Детската клиника, како и Твининг-програмата со Берлин и Кембриџ.
Според него, Македонија сега има сеопфатна програма за третман на цистична фиброза и е меѓу земјите во регионот со таков пристап.
Клековски им се заблагодари и на лекарите кои континуирано работат со пациентите, како и на пациентите и нивните родители за нивната упорност и ангажман.
Тој посочи дека важен дел од напредокот е и охрабрувањето на пациентите јавно да зборуваат за своите проблеми, особено поради стигматизацијата со која, како што рече, сè уште се соочуваат различни групи во општеството.
