Вработен во американската Федерална управа за воздухопловство (Federal Aviation Administration) е уапсен под сомнение дека упатувал закани за убиство кон претседателот на САД, Доналд Трамп, соопштија обвинителите.
Станува збор за 35-годишниот Дин Делечијај од Њу Хемпшир, кој, според истрагата, користел службен компјутер за пребарувања поврзани со внесување оружје во федерална зграда, како и заканувачки формулации насочени кон претседателот. Освен тоа, тој наводно пребарувал и информации за семејствата на потпретседателот Џ. Д. Венс и министерот за одбрана Пит Хегсет.
Случајот бил пријавен откако Делечијај побарал од ИТ-службата да ја избрише историјата на пребарување од службениот компјутер. Агент на Тајната служба го испрашал во неговиот дом, при што, според судските документи, тој признал дека ги извршил спорните пребарувања.
Обвинителите наведуваат дека мотивот бил гнев кон актуелната администрација, поврзан со изборите, претседателските помилувања и други политички прашања. Во истрагата било утврдено и дека осомничениот поседува огнено оружје, а дополнително се товари дека испратил електронска порака до Белата куќа со заканувачка содржина.
Доколку биде прогласен за виновен, му се заканува казна затвор до пет години, како и парична казна до 250.000 долари.
Американското Министерство за правда соопшти дека во изминатата недела се отворени уште неколку случаи поврзани со закани кон Трамп, што укажува на зголемена загриженост кај безбедносните служби.
