Марк Закерберг побара од американската влада да ги ублажи регулативите за моделите на вештачка интелигенција со отворен код, со цел американските компании полесно да им конкурираат на кинеските ривали.
Повикот од директорот на „Мета“ доаѓа откако компанијата претстави нов модел на вештачка интелигенција со отворен код, наречен Muse Glimmer. Моделот е значително помал од водечките системи на конкурентските компании и е наменет за таканаречена агентска вештачка интелигенција. Според компанијата, може да работи и на персонални компјутери со само една графичка картичка.
Моделите со отворен код вообичаено се поевтини од водечките модели на компании како OpenAI и Anthropic, а истовремено овозможуваат поголема приспособливост кон потребите на корисниците.
Закерберг смета дека САД мора повторно да ги разгледаат своите политики доколку сакаат американските компании да останат лидери во развојот на модели со отворен код.
„Политиките на САД мора да ги намалат овие дополнителни пречки ако сакаме американските модели со отворен код со текот на времето да бидат водечки“, порача Закерберг.
Според него, кинеските развојни компании во моментов имаат одредена предност во оваа област. Како примери се наведуваат моделите Kimi K3 на Moonshot, Qwen3.8-Max на Alibaba и DeepSeek V4-Flash, кои се натпреваруваат со најмоќните системи на американските компании.
За разлика од нив, водечките модели на OpenAI, Anthropic и Alphabet се со затворен код.
Закерберг предупреди дека американските компании се соочуваат со дополнителни ограничувања во однос на податоците што можат да ги користат за тренирање на моделите со вештачка интелигенција.
Тој истовремено ја поддржа и таканаречената дестилација на вештачката интелигенција – процес во кој помоќни системи се користат за тренирање на помали модели.
Администрацијата на американскиот претседател Доналд Трамп претходно најави дека нема да бара безбедносни тестирања за моделите со отворен код, според извори запознаени со прашањето.
„Мета“ во меѓувреме се обидува да ја зацврсти својата позиција во трката за развој на напредна вештачка интелигенција, откако минатата година формираше тим за истражување на таканаречената суперинтелигенција.
