Во Основниот суд во Куманово во четврток (9 јули) започнува судскиот процес против 25-годишниот Т.Б. од Старо Нагоричане, обвинет за четири кривични дела убиство и два обида за убиство, соопшти Основното јавно обвинителство Куманово.
Според обвинението, Т.Б. се товари за четири кривични дела „убиство“ од член 123 став 2 точка 4 од Кривичниот законик, како и за два обида за убиство од истиот квалификуван облик.
Од Обвинителството наведуваат дека, бидејќи обвинетиот со умисла лишил од живот повеќе лица, согласно член 123 став 3 од Кривичниот законик, му се заканува казна затвор од најмалку 10 години или доживотен затвор.
Предметот пред Основниот суд во Куманово ќе го застапува јавниот обвинител Љубомир Лапе од Основното јавно обвинителство Куманово.
