Денеска се очекува пресудата за серискиот убиец Трајко Бојковски од Старо Нагоричане, обвинителството бара доживотен затвор

Основниот суд во Куманово денеска треба да ја објави пресудата за Трајко Бојковски, обвинет за четири убиства и два обида за убиство на жени во регионот на Старо Нагоричане. Обвинителството бара доживотен затвор, додека одбраната повикува судот да ги земе предвид олеснителните околности.

— реклама —

Завршните зборови во постапката беа изнесени на 6 октомври, по што судот го определи 9 октомври за објавување на одлуката.

Јавниот обвинител Љубомир Лапе побара Бојковски да биде прогласен за виновен за убиствата на Станче Каровска, Јанка Антевска, Марија Маринковска и Мира Станковска, како и за обидите за убиство на Росанка Трајковска и Слободка Арсовска.

— реклама —

Во завршните зборови обвинителството посочи дека делата биле извршени на сличен начин. Како клучни докази ги издвои ДНК-трагите пронајдени кај дел од жртвите и кај една од жените што ги преживеале нападите.

— реклама —

Обвинителот се повика и на психијатриското вештачење, според кое постои висок ризик обвинетиот повторно да изврши кривични дела, како и сериозни пречки за неговата ресоцијализација. Обвинителството смета дека овие наоди се дополнителен аргумент за изрекување доживотна казна затвор.

Одбраната, застапувана од адвокатот Тони Цветковски, кој му е доделен на Бојковски по службена должност, побара при одмерувањето на казната да се разгледаат и олеснителните околности.

Со денешното објавување на пресудата се очекува да заврши првостепената постапка пред Основниот суд во Куманово.