Судскиот процес против 25-годишниот Трајче Бојковски, обвинетиот за четири убиства и два обида за убиство продолжи во Куманово, а неговото однесување на првото рочиште предизвика внимание.
Невропсихијатарот Мице Дудучки, коментирајќи го однесувањето на обвинетиот, кој се смеел и гледал во таванот, оцени дека станува збор за однесување што може да се поврзе со таканаречениот Ганзеров синдром.
„Се работи за личност која во просториите на судот покажува псевдодементно однесување, а ние психијатрите тоа го нарекуваме Ганзеров синдром, односно глумење лудило, со цел – ‘не се сеќавам’“, изјави Дудучки.
Во постапката на обвинетиот му е назначен адвокат по службена должност, откако адвокатот што претходно го застапувал го откажал полномошното бидејќи обвинетиот, спротивно на неговиот совет, не признал вина.
Дудучки нагласува дека евентуалното постоење психопатологија само по себе не значи дека лицето е непресметливо.
„Јас сум поборник на смртна казна кога се работи за убиства со умисла, посебно од користољубие“, вели тој.
