Обвинителството бара доживотен затвор за серискиот убиец Бојковски од Старо Нагоричане за четири убиства и два обида

Со барање за доживотен затвор за 25-годишниот Трајко Бојковски од Старо Нагоричане завршија завршните зборови во судскиот процес во кој тој е обвинет за четири убиства на постари жени и два обида за убиство.

Обвинителот Лапе во завршниот збор навел дека обвинетите дела биле извршени „заради задоволување на половите нагони врз мртви тела, односно некрофилија“. Според обвинителството, кај Бојковски биле забележани отсуство на емпатија, вина и страв, а при извршувањето на делата бил пресметлив и се обидувал да манипулира.

— реклама —

Од обвинителството оцениле дека кај обвинетиот не постои можност за ресоцијализација и дека постои висок степен на опасност од повторување на кривичните дела.

— реклама —

„Едноставно не гледам како би можел повторно да се вклопи во општеството“, изјавил обвинителот Лапе, образложувајќи го барањето за најстрога казна.

На страната на кривичниот прогон се приклучила и одбраната на семејствата на оштетените, која побарала и надомест на штета. Блиските на убиените жени сметаат дека доказите предложени од обвинителството треба соодветно да бидат оценети и очекуваат одлука која, како што навеле, ќе биде во интерес на општеството и ќе има превентивно дејство.

— реклама —

Одбраната на Бојковски, пак, оспорила едно од убиствата, како и мотивите за двата случаи во кои му се ставаат на товар обиди за убиство.

Во текот на постапката Бојковски признал три убиства и изразил каење за стореното. Неговите бранители побарале судот при одмерувањето на казната да ги земе предвид признанието и каењето како олеснителни околности.

Судот се очекува да ја објави пресудата во петок.