Односите меѓу САД и Куба повторно се заоструваат по новите потези на администрацијата на Доналд Трамп, кои предизвикаа реакции и предупредувања за можна ескалација.
Новите тензии следуваат по федералното обвинение против поранешниот кубански лидер Раул Кастро, поврзано со соборувањето на два цивилни авиони во 1996 година, кога загинаа четворица кубанско-американски државјани.
Во меѓувреме, Вашингтон дополнително ги засили економските санкции кон Хавана, што, според аналитичарите, дополнително ја влошува состојбата на островот, каде веќе има проблеми со снабдување со храна, енергија и чести прекини на струја.
Поранешниот американски дипломат Рикардо Зунига предупреди дека прекинот на комуникацијата меѓу двете земји може да доведе до опасна ескалација.
Кубанските власти ги отфрлија новите мерки, а претседателот на државата порача дека земјата ќе се брани од секој надворешен напад. Според американски медиуми, кубанската армија веќе спроведува воени вежби поради страв од можна интервенција.
Иако официјално е во пензија, 94-годишниот Раул Кастро и натаму има силно влијание врз политичкиот и безбедносниот систем во Куба.
