Тензии повторно се појавуваат во трговските односи меѓу Европската Унија и Соединетите Американски Држави, откако најновата рунда преговори за спроведување на рамковен трансатлантски договор заврши без конкретен резултат.
Неуспехот да се постигне компромис отвора можност за ново зголемување на американските царини кон европскиот извоз, особено во автомобилскиот сектор, на што претходно предупреди американскиот претседател Доналд Трамп.
Преговорите меѓу Европскиот парламент, Европската комисија и земјите-членки траеле до доцна во ноќта, но и покрај обидите за усогласување на ставовите, не било постигнато конечно решение околу договорот, кој начелно беше договорен претходно.
Според првичната рамка, Европската Унија би ги укинала царините за американските индустриски производи, додека САД би вовеле царина до 15 проценти за дел од европскиот извоз, вклучително и автомобилите. Сепак, спроведувањето на договорот е забавено, бидејќи ЕУ сè уште не ги завршила сите законски процедури.
Американската страна предупредува дека понатамошно одложување може да доведе до нови мерки, вклучително и зголемување на царините за европските возила.
Во Европската Унија, дел од европратениците изразуваат резерви и бараат дополнителни гаранции пред финално усвојување на договорот, наведувајќи потреба од заштита на европските економски и стратешки интереси.
И покрај несогласувањата, двете страни изразуваат подготвеност за продолжување на разговорите, со цел постигнување договор во наредниот период. Следна рунда преговори се најавува, но датумот сè уште не е потврден, додека целта останува постигнување договор пред истекот на привремените трговски мерки.
