Украинскиот претседател Володимир Зеленски упати остро предупредување до белоруското раководство, барајќи во рок од една недела да биде демонтирана руската опрема за пренос на сигнали во регионите Гомел и Брест, за која Киев тврди дека се користи за напади со беспилотни летала врз украински цивили и инфраструктура.
Во своето вечерно обраќање, Зеленски порача дека Белорусија мора со конкретни чекори да покаже дека навистина се противи на војната, а не само преку неофицијални изјави.
„Белорусија мора со дела да го потврди она што нејзиното раководство го соопштува преку неофицијални канали, за Украина навистина да види дека Минск е против оваа војна“, изјави Зеленски.
Тој посочи дека Украина располага со информации за најмалку четири руски сигнални станици лоцирани во белоруските региони Гомел и Брест, кои, според него, биле користени за насочување напади врз Житомирската, Ривненската и Волинската Област.
Зеленски директно му се обрати и на белорускиот претседател Александар Лукашенко, повикувајќи го да ја отстрани спорната воена инфраструктура.
„Ако не сака да учествува во оваа војна, нека ја отстрани и исклучи оваа опрема“, рече украинскиот претседател, додавајќи дека, доколку тоа не се случи во рок од една недела, украинските сили ќе преземат мерки за нејзино уништување.
Покрај тоа, Зеленски ја обвини Белорусија дека обезбедува значајна логистичка поддршка за руската војска, особено преку испорака на гориво и компоненти за оружје.
„Од јануари до мај испораките на бензин од Белорусија во Русија се зголемиле 13 пати во споредба со истиот период лани, додека испораките на дизел се тројно повисоки“, изјави Зеленски.
Тој оцени дека ваквата поддршка сè повеќе ја вовлекува Белорусија во конфликтот.
Од друга страна, Лукашенко неодамна изјави дека вклучувањето на Белорусија во војната е „апсолутно неприфатливо“ и ја отфрли можноста неговата земја директно да учествува во судирот.
