Украинскиот претседател Володимир Зеленски изјави дека Русија само во текот на изминатата недела извршила масовни напади врз Украина со илјадници дронови, ракети и наведувани авионски бомби.
Во објава на социјалната мрежа Икс, Зеленски наведе дека руските сили лансирале повеќе од 2.300 ударни дронови, околу 1.560 наведувани авионски бомби и 108 ракети од различни типови.
„Сите овие напади беа насочени кон цивилна инфраструктура, станбени објекти и енергетски капацитети“, истакна украинскиот претседател.
Тој нагласи дека Украина секојдневно работи на зајакнување на воздушната одбрана и потврди дека земјата добила нов лансер од германскиот противвоздушен систем IRIS-T.
Зеленски ѝ се заблагодари на Германија за континуираната воена поддршка, оценувајќи дека благодарение на ваквите системи биле спасени илјадници животи.
Истовремено, тој порача дека на Украина ѝ се потребни дополнителни ракети за противвоздушна одбрана за поефикасно справување со руските напади.
Украинскиот лидер посочи и дека неделава биле постигнати нови договори со Шведска, кои вклучуваат нов пакет воена помош и дополнително јакнење на украинската авијација со борбени авиони Saab JAS 39 Gripen.
Според Зеленски, противбалистичката одбрана останува еден од најважните приоритети на Киев.
„Силната воздушна одбрана значи подобра заштита за нашите граѓани и одземање на една од последните предности што Русија сè уште ги има“, порача тој.
