Украинскиот претседател Володимир Зеленски соопшти дека во текот на ноќта руските сили извршиле масовен ракетен и беспилотен напад врз повеќе делови на Украина, при што загинало цело семејство во областа Дњепропетровск.
Според Зеленски, во населбата Радушне, балистичка ракета погодила семејна куќа, при што животот го загубиле двајца родители и нивните три деца. Под урнатините биле пронајдени уште две деца, кои биле извлечени живи.
„Тоа беше обична семејна куќа, претворена во урнатини од балистичка ракета“, напиша Зеленски на социјалната мрежа Икс.
Тој додаде дека спасувачките екипи интервенираат и во Лавов, каде што е погодена станбена зграда, а потрагата по евентуални преживеани продолжува.
Според украинскиот претседател, во нападите биле погодени Киев и Киевската област, како и регионите Дњепропетровск, Лавов, Полтава, Харков, Николаев, Суми, Виница, Черкаси и Ивано-Франкивск. Уништени или оштетени биле десетици станбени објекти, цивилни претпријатија и инфраструктура, а повредени се десетици лица.
Зеленски наведе дека Русија во нападот употребила повеќе од 70 ракети, меѓу кои голем број балистички, како и повеќе од 280 беспилотни летала. Според него, украинската противвоздушна одбрана пресретнала повеќе од 260 дронови и соборила значителен број крстосувачки ракети.
Во својата порака тој повторно апелираше до западните партнери за побрза испорака на системи и ракети за противвоздушна одбрана, оценувајќи дека доцнењето на воената помош директно влијае врз бројот на жртвите и размерите на уништувањето.
Според претходните информации од украинските власти, во руските напади што се случија во текот на ноќта загинале најмалку девет лица. Покрај жртвите во областа Дњепропетровск, две лица загинале во Киев, а едно лице во Полтавската област.
