Силен земјотрес рано утринава го погоди подрачјето долж брегот на италијанската област Калабрија, а потресот бил почувствуван и во пошироките делови на јужна Италија, јавуваат тамошните медиуми.
Според податоците на Италијанскиот институт за геофизика и вулканологија, земјотресот имал магнитуда од 6,1 степен според Рихтеровата скала. Епицентарот бил лоциран во Тиренското Море, во близина на градот Козенца, на околу 240 километри југоисточно од Неапол.
Потресот бил регистриран на длабочина од приближно 250 километри, што придонело да биде почувствуван на пошироко подрачје.
Според информациите на италијанската новинска агенција АНСА, земјотресот бил почувствуван низ цела Калабрија, како и во околината на вулканот Везув и во источните делови на регионот Базиликата.
Засега нема информации за предизвикани материјални штети или повредени лица. Надлежните служби ја следат состојбата и вршат проценка на евентуалните последици од земјотресот.
Италија е една од најсеизмички активните земји во Европа и често се соочува со земјотреси со различен интензитет, особено во јужните делови на земјата.
