Украинскиот претседател Володимир Зеленски соопшти дека руските сили во текот на изминатата недела лансирале 95 ракети, од кои повеќе од половината биле балистички, како и речиси 1.700 беспилотни летала насочени кон цели во Украина.
Според Зеленски, во истиот период биле фрлени и повеќе од 1.630 наведувани авионски бомби.
Тој наведе дека само во текот на изминатата ноќ Русија истрелала осум ракети и 136 дронови од различни типови. Нападите, според него, ги погодиле Херсонската, Доњецката, Дњепропетровската, Харковската, Сумската, Одеската, Миколаевската, Запорошката и Черниговската област, како и главниот град Киев.
Зеленски соопшти дека во Киев три лица се повредени во напад со балистички ракети, додека во Харков едно лице загинало, а девет се повредени, меѓу кои и две деца, по удар на беспилотно летало врз станбени објекти.
Тој додаде дека спасувачките служби продолжуваат со расчистување на последиците од нападите, како и со гаснење пожар во хипермаркет во Криви Рих.
Украинскиот претседател повторно апелираше до западните сојузници побрзо да испорачаат системи за противвоздушна одбрана и ракети-пресретнувачи, оценувајќи дека тие се клучни за заштита на цивилното население и намалување на руската предност во употребата на балистички ракети.
