Бројот на жртви од западнонилска треска во Македонија достигна седум, откако почина 69-годишен маж од Гази Баба. Тој имал повеќе хронични заболувања, а во болница бил повеќе од 38 дена. Во исто време, здравствените власти регистрирале нов сомнителен случај во Радишани, а 19 пациенти сè уште се лекуваат во болнички услови.
Досегашните податоци покажуваат дека сите седум смртни случаи се кај мажи постари од 60 години. Институтот за јавно здравје до 25 август регистрирал вкупно 50 случаи на западнонилска треска – 39 кај мажи и 11 кај жени. Од нив, 49 развиле невроинвазивна форма на инфекцијата, која може да предизвика сериозни оштетувања на нервниот систем, вклучително и воспаление на мозокот и мозочните обвивки.
До истиот датум биле евидентирани пет смртни случаи кај мажи на возраст од 62 до 83 години. Иако со најновите два смртни исходи се продолжува истиот образец, експертите предупредуваат дека бројот на случаи во Македонија е премал за да се извлече заклучок дека полот е директна причина за потешкиот тек на болеста.
Слични показатели, сепак, се забележани и во странство. Истражување во САД со 3.064 пациенти покажало дека мажите имале околу 29 отсто поголема веројатност да развијат невроинвазивна форма. Кога станува збор за смртните исходи, меѓу клучните фактори се издвоиле возраста, невроинвазивната форма на болеста, хроничните бубрежни заболувања и заболувањата на мозокот и крвните садови.
Анализа на американските Центри за контрола и превенција на болести, која опфатила повеќе од 12.000 невроинвазивни случаи во период од десет години, покажала дека 62 отсто од пациентите биле мажи. Кај лицата постари од 70 години, разликата била уште поизразена – зачестеноста кај мажите била повеќе од двојно поголема отколку кај жените.
Сепак, науката сè уште нема единствено објаснување за оваа појава. Не постојат доволно докази дека мажите почесто се заразуваат со вирусот, туку дека кај нив почесто се развива тешката невроинвазивна форма. Меѓу можните причини се наведуваат разликите во изложеноста на комарци, хроничните заболувања, имунолошкиот одговор и начинот на кој се откриваат и евидентираат инфекциите.
Најголем ризик за сериозен тек имаат лицата над 60 години, луѓето со ослабен имунитет и пациентите со хронични заболувања, како дијабетес, висок крвен притисок, бубрежни и малигни заболувања. Тешка невролошка форма се развива кај помалку од еден отсто од заразените, но кај оние што ќе ја развијат, ризикот од смртен исход е значително поголем.
За намалување на ризикот од инфекција, Институтот за јавно здравје препорачува да се отстранува застоената вода од дворовите, да се користат заштитни мрежи на прозорците и средства против комарци, како и облека која го покрива поголемиот дел од телото.
Висока температура, силна главоболка, вкочанет врат, збунетост, тресење или слабост на рацете и нозете се предупредувачки симптоми поради кои треба веднаш да се побара лекарска помош.
