„10 милиони евра за фушерај - „Стив Наумов“ веќе се распаѓа со водени ѕидови, расипано парно, пукнати цевки и мизерна храна“, велат од Левица

Левица преку соопштение обвинува дека во студентскиот дом „Стив Наумов“ се појавиле сериозни проблеми помалку од еден месец по вселувањето на студентите, иако за реконструкцијата биле издвоени околу 10 милиони евра.

— реклама —

Од партијата велат дека на објавени фотографии се гледа како вода протекува низ ѕидовите при дожд, а до нив пристигнувале и пријави за проблеми со греењето, водата, електричната енергија и интернетот. Според наводите на Левица, во домот нема парно, од чешмите тече заматена вода, делови од објектот повремено остануваат без струја, а веќе имало и пукнати цевки. Студентите, според партијата, се жалат и на квалитетот на храната.

— реклама —

Од Левица посочуваат дека реконструкцијата се подготвувала со години и траела повеќе од две години, додека министерката за образование и наука, Весна Јаневска, проектот го претставувала како значаен чекор кон подобрување на студентскиот стандард.

— реклама —

Партијата оценува дека пријавените проблеми отвораат прашања за квалитетот на изведените работи, надзорот и трошењето на јавните средства. Во соопштението се наведува и дека студентите се соочуваат со тешки услови за живот, ниски студентски примања и зголемени трошоци за образование и живот.

Левица бара итно отстранување на сите недостатоци во студентскиот дом „Стив Наумов“, обезбедување соодветни услови за живот и студирање, како и целосна одговорност за квалитетот на реконструкцијата, надзорот и потрошените средства.