Новата учебна 2026/2027 година во Македонија започнува со промени во мрежата на училиштата, откако 26 подрачни училишта во руралните средини привремено ќе престанат со работа поради недоволен број ученици.
Во дел од овие училишта нема ниту едно запишано прваче, додека во други наставата ја следеле само неколку ученици. Поради тоа, учениците од нив ќе го продолжат образованието во најблиските поголеми училишта.
Министерката за образование и наука, Весна Јаневска, информираше дека намалениот број ученици довел и до намалување на бројот на паралелките. Во основното и средното образование годинава ќе има 433 паралелки помалку, од кои 222 во основното и 211 во средното образование.
Според податоците на Министерството, во образовниот систем моментално има околу 238.000 ученици – 174.000 во основното и 64.000 во средното образование. Досега се запишани 14.952 првачиња и 16.932 ученици во прва година во средно образование, а конечниот број ќе биде познат по завршувањето на дополнителните уписни рокови.
Јаневска посочи дека намалувањето на бројот на паралелки е последица на намалениот број ученици, при што малите паралелки се спојуваат за да се создадат подобри услови за учење и социјализација. Таа нагласи дека ниту еден редовно вработен наставник не останал без работа поради оваа промена.
Особено загрижува податокот дека бројот на училишни објекти без ученици достигнал 148. Според надлежните, тоа е последица на демографските промени и намалувањето на бројот на деца, особено во помалите и руралните населени места.
И покрај привременото затворање на дел од подрачните училишта, Владата најавува инвестиции во образовната инфраструктура. Во моментов се прошируваат капацитетите на 14 училишта, главно во скопските општини, а во следните месеци етапно треба да започнат уште 15 проекти.
Од Министерството за образование и наука информираат и дека учебниците навреме се дистрибуирани во училиштата, а обезбедени се и образовни асистенти за учениците со посебни образовни потреби.
Намалувањето на бројот на ученици и привременото затворање на подрачни училишта повторно го отвора прашањето за демографските промени во земјата, особено во средините каде што нема доволно деца за организирање настава.
