Резултатите од ПИСА 2025 покажуваат нов пад на постигањата на македонските ученици, при што околу 74 проценти од 15-годишниците не го достигнуваат основното ниво на знаење и вештини, објави Организацијата за економска соработка и развој (ОЕЦД).
Најслабите резултати се забележуваат по математика и читање со разбирање. Македонските ученици на тестирањето освоиле просечно 379 бодови по математика, 354 по читање со разбирање и 377 бодови по природни науки. Просекот на земјите од ОЕЦД по математика е околу 472 бодови.
Според методологијата на ОЕЦД, околу три четвртини од учениците во Македонија се под нивото 2, кое се смета за основен праг на знаење и функционална писменост потребни за успешно учество во современото општество.
Само еден процент од македонските ученици се пласирале на највисоките нивоа, 5 и 6. За споредба, просекот во земјите на ОЕЦД е над осум проценти.
Резултатите покажуваат дека Македонија и понатаму е меѓу најслабопласираните во регионот. Србија има просек од 440 бодови по математика, Црна Гора 406, а Босна и Херцеговина 398. Македонија со 379 бодови е пред само Косово, кое има просек од 355 бодови.
Извештајот укажува и на значителен образовен јаз поврзан со социо-економскиот статус на семејствата. Учениците од семејства со повисоки приходи и повисоко образование на родителите во просек постигнуваат 65 бодови повеќе од учениците од ранливите семејства.
Дополнителен јаз постои и меѓу учениците од урбаните и руралните средини, а меѓу проблемите се издвојуваат инфраструктурните разлики, недостигот од современи наставни средства и слабата практична примена на стекнатото знаење.
