Со свечена приредба во ООУ „Киро Глигоров“ во Општина Центар денеска беше одбележан почетокот на новата учебна 2026/2027 година. По летниот распуст, во училишните клупи се враќаат околу 238 илјади ученици – 174 илјади основци и 64 илјади средношколци.
Наставата за повеќето ученици ќе трае до 10 јуни 2027 година, додека матурантите ќе завршат на 17 мај. Зимскиот распуст ќе биде од 31 декември до 21 јануари.
Според досега пристигнатите податоци во Министерството за образование и наука, годинава се запишани 14.952 првачиња и 16.932 средношколци во прва година. Учебниците се веќе доставени до училиштата, а годинава се набавени 622 илјади примероци.
Едносменска настава ќе се реализира во 620 од вкупно 1.023 училишни објекти. Паралелно продолжуваат инвестициите во доградба и реконструкција на училиштата, особено во средините каде што нема доволно просторни услови.
Во новата учебна година се ангажирани и рекорден број образовни асистенти – 1.358 во основното и 166 во средното образование, наменети за поддршка на учениците со посебни образовни потреби.
Од Министерството за образование и наука најавуваат дека продолжува и поддршката за талентираните ученици, како и мерките за поевтин училишен прибор и ученички стипендии.
