Посебен пречек ги очекуваше првачињата во ООУ „Кузман Јосифовски – Питу“ во Кисела Вода, каде што првиот училишен ден им беше збогатен со средба со нивните омилени суперхерои од детството.
Малите ученици беа пречекани со маскирани суперхерои, што предизвика бројни насмевки, радост и возбуда кај првачињата.
За еден од родителите, овој начин на пречек бил посебен момент кој децата долго ќе го паметат. Родителот решил да го сподели искуството за да му се заблагодари на целиот училишен тим кој учествувал во подготовката.
„Имавме потреба да го споделиме тоа како задоволни родители, бидејќи сè уште има училишта кои се грижат за среќата на нашите деца. Беше магично. Би ни било драго доколку се објави веста за да им кажеме едно големо благодарам на целиот тим што стои зад таа прекрасна приредба“, се вели во пораката од задоволниот родител.
Пречекот за првачињата во училиштето така помина во празнична атмосфера, со цел нивниот прв ден во училиште да започне со убави спомени.
