Денеска во училишните клупи се враќаат околу 238 илјади ученици – 174 илјади основци и 64 илјади средношколци, со што започнува учебната 2026/2027 година. Наставата за повеќето ученици ќе трае до 10 јуни 2027 година, додека матурантите ќе завршат со настава на 17 мај. Зимскиот распуст ќе трае од 31 декември до 21 јануари.
Според досега пристигнатите податоци во Министерството за образование и наука, годинава се запишани 14.952 првачиња, како и 16.932 ученици во прва година средно образование. Конечните бројки за запишаните ученици се очекува да бидат утврдени наскоро.
Во училиштата се испорачани учебниците во количини согласно со барањата доставени од училиштата. Министерството годинава набавило 622 илјади учебници, а според министерката за образование и наука Весна Јаневска, со набавките се остварени заштеди од 50 милиони денари во споредба со годината пред таа да ја преземе функцијата.
„Трета година по ред учебниците се навреме набавени во тираж кој го побараа училиштата. Тие се испорачани и од 1 септември може да им бидат поделени на учениците“, истакна Јаневска.
Целосно нови учебници во полн тираж се обезбедени за прво, второ и трето одделение, каде што учебниците содржат и работни листови, како и за осмо одделение и за втор клас во гимназиското образование, каде што од оваа учебна година ќе се применуваат нови наставни програми.
Едносменска настава годинава ќе се реализира во 620 од вкупно 1.023 училишни објекти. Од МОН оценуваат дека ваквиот начин на организација овозможува поголема концентрација на часовите, подобра социјализација и повеќе време учениците да го совладаат наставниот материјал и да стекнат соодветни вештини.
Поради недостиг на простор во дел од училиштата, особено во поголемите градови, продолжуваат инвестициите во доградба на училници. Во моментов се работи на 14 училишта во Центар, Карпош, Аеродром, Ѓорче Петров, Бутел, Гази Баба, Илинден и Градско, додека уште 15 проекти треба етапно да започнат во следните неколку месеци.
Преку владината програма за финансирање капитални проекти во општините, во тек се околу 50 инвестиции за изградба и реконструкција на училишта, како и за изградба на спортски сали и училишни базени.
Паралелно се спроведува и оптимизација на училишната мрежа. Годинава бројот на паралелки ќе биде намален за 433 – за 222 во основното и за 211 во средното образование, поради спојување на паралелки со мал број ученици.
Поради немање запишани ученици, од септември привремено се затвораат 26 подрачни училишта. Во земјава вкупно има 148 празни училишни објекти, главно во руралните средини.
Од МОН нагласуваат дека оптимизацијата нема да значи отпуштање на редовно вработени наставници. Дел од наставниците кои немаат полн фонд на часови ќе бидат ангажирани во целодневна настава или дневен престој, а дел, доколку сакаат, ќе можат да работат како образовни асистенти.
За учениците со посебни образовни потреби годинава се ангажирани најмногу образовни асистенти досега – 1.358 во основното и 166 во средното образование. За учениците кои подолго време се на болничко или домашно лекување, останува можноста да следат настава онлајн заедно со својот клас или наставникот индивидуално да работи со нив.
МОН продолжува и со поддршката на талентираните ученици, при што ќе ги покрива трошоците за патување и учество на меѓународни научни олимпијади.
До 30 септември ќе важи и мерката за најмалку 15 отсто пониски цени на училишниот прибор, додека во октомври се очекува да бидат објавени конкурсите за ученички стипендии.
Наставниците, пак, во март 2027 година треба да добијат ново зголемување на платите од 7,5 до 10 отсто, зависно од стапката на инфлација. Зголемувањето е предвидено согласно со договорот меѓу МОН и СОНК од пред две години.
