Секој 18-ти вработен во училиштата бил изложен на сексуално вознемирување, техничкиот персонал е трипати позагрозен од наставниците

Несакани допири, навредливи сексуални шеги, закани и ветувања за напредување на работното место во замена за сексуални услуги се меѓу облиците на сексуално вознемирување утврдени во училиштата, покажува истражување на Комисијата за спречување и заштита од дискриминација (КСЗД).

Истражувањето опфатило 1.057 вработени во 26 училишта низ Македонија. Резултатите покажуваат дека жените се до 4,6 пати почесто изложени на сексуално вознемирување од мажите, додека вработените во техничките служби се речиси трипати позагрозени од наставниот кадар.

— реклама —

Според податоците на Комисијата, навредливите сексуални шеги се најчестата форма на вознемирување на работното место, со застапеност од 5,5 проценти. Речиси секој осумнаесетти вработен бил изложен на вакви коментари, а секој единаесетти вработен во техничките служби, односно девет проценти, пријавил дека доживеал несакан допир.

— реклама —

„Училиштето треба да биде безбедно место не само за учениците, туку и за секој што работи во него. Сексуалното вознемирување не е шега ниту приватен проблем – тоа е дискриминација забранета со закон“, изјави Зекир Абдулов, потпретседател на КСЗД.

Тој посочи дека Законот за спречување и заштита од дискриминација го препознава сексуалното вознемирување како форма на дискриминација и предвидува обврска за работодавачите да преземаат мерки за негово спречување. Од Комисијата информираат дека веќе постапувале и по претставки поврзани со вакви случаи.

— реклама —

„‘Ајде бе, само шега беше’. Колку пати сте ја слушнале оваа реченица? Шега е кога сите се смеат. Кога некој молчи, се црвени или излегува од просторијата, тоа е вознемирување“, нагласуваат од КСЗД.

Од Комисијата најавуваат дека во наредните месеци, во рамките на проектот „Виолет“, ќе спроведат и медиумски кампањи за подигнување на свеста за сексуалното вознемирување, негово препознавање и начините за пријавување.

„Ако го доживувате или сте сведок на сексуално вознемирување, не сте сами. Пријавете до КСЗД“, порачуваат од Комисијата.