Македонија денеска го одбележува 8 Септември – Денот на независноста, 35 години по историскиот референдум на кој граѓаните ја потврдија својата одлука за суверена и самостојна држава.
На 8 септември 1991 година, граѓаните на тогашна Република Македонија се изјаснија на референдум за суверена и самостојна Македонија, со право да стапи во иден сојуз на суверени држави на Југославија.
Од вкупно 1.495.626 запишани избирачи, на гласање излегле 1.132.981 граѓанин, а 1.079.308 гласале „за“. Со над 95 проценти поддршка од излезените гласачи, референдумот ја потврди волјата за независност.
Процесот кон самостојност беше започнат уште на 25 јануари 1991 година, кога Собранието ја усвои Декларацијата за сувереност на Република Македонија.
Истата вечер, по референдумот, илјадници граѓани се собраа на плоштадот „Македонија“ во Скопје, каде што ги очекуваа резултатите од гласањето. Пред насобраните граѓани тогаш се обрати првиот претседател Киро Глигоров, честитајќи им ја одлуката за слободна, суверена и самостојна Македонија.
Во изминатите 35 години државата помина низ бројни политички, економски и општествени предизвици, градејќи ги своите институции и меѓународната позиција.
Денот на независноста денес се одбележува со низа свечености и настани низ државата. Централната државна манифестација ќе се одржи на платото пред Владата, каде што ќе се обрати премиерот Христијан Мицкоски.
Одбележувањето ќе продолжи вечерва на Националната арена „Тодор Проески“ со голем концерт по повод Денот на независноста, на кој како главна музичка ѕвезда е најавен светски познатиот диџеј Дејвид Гета.
По 35 години, 8 Септември останува еден од најзначајните датуми во современата историја на Македонија – ден кога граѓаните на референдум ја изразија својата волја за независна и самостојна држава.
