40 општини ќе добијат директна поддршка за локален економски развој

Четириесет општини во земјава ќе добијат директна стручна поддршка за подготовка на плански документи за локален економски развој, најави министерот за локална самоуправа Златко Перински на работен состанок организиран во рамки на Ресурсниот центар за поддршка на општините.

— реклама —

Во своето обраќање, Перински истакна дека Министерството за локална самоуправа продолжува да развива конкретни механизми за јакнење на капацитетите на општините и за поефикасно извршување на нивните надлежности.

„Во изминатиот период преку Ресурсниот центар испорачавме повеќе важни алатки и документи наменети за градоначалниците и општинските администрации. Денеска започнуваме нова фаза на поддршка преку групна испорака на стручна помош за подготовка на плански документи за локален економски развој, согласно потребите што самите општини ги идентификуваа“, истакна Перински.

— реклама —

Тој нагласи дека целта не е Министерството само декларативно да биде партнер на локалната самоуправа, туку преку конкретни активности да придонесе за олеснување на работата на општините и унапредување на локалните политики.

— реклама —

„Локалната самоуправа е самостојна во извршувањето на своите надлежности, но преку партнерска соработка и взаемна поддршка можеме да постигнеме многу повеќе. Затоа градиме систем во кој знаењето, експертизата и расположливите ресурси ќе бидат ставени во функција на развојот на општините“, порача министерот.

Во рамки на оваа иницијатива, експертски тимови ќе обезбедат поддршка за изработка на плански документи кои треба да придонесат за креирање квалитетни и применливи решенија за поттикнување на локалниот економски раст, привлекување инвестиции и подобрување на условите за живот на граѓаните.

— реклама —

Ресурсниот центар, кој функционира во рамки на Министерството за локална самоуправа, претставува механизам за обезбедување стручна, техничка и советодавна поддршка на општините, во согласност со нивните потреби и предизвици.