Во периодот од 30 март до 5 април 2026 година, Државен пазарен инспекторат спровел вкупно 523 инспекциски надзори на територија на цела држава, при што биле издадени 154 прекршочни платни налози во вредност од над 2,88 милиони денари.
Најголем дел од контролите се реализирани согласно Законот за трговија, каде се извршени 215 надзори и издадени 71 платен налог. Следуваат контролите според Законот за финансиска дисциплина со 106 надзори и 27 санкции, како и Законот за угостителска дејност со 37 надзори и 17 прекршочни налози.
Инспекциски контроли биле спроведени и во други области, меѓу кои заштита од пушење, заштита на потрошувачи, занаетчиство, метрологија и туристичка дејност, при што во дел од нив биле изречени санкции, а во дел не биле утврдени неправилности.
Дополнително, инспекторатот изрекол 64 опомени, по што во наредниот период ќе следуваат контролни надзори за проверка на нивното постапување.
Од Државниот пазарен инспекторат информираат дека континуирано спроведуваат надзори во рамки на своите надлежности, согласно законските прописи и утврдените годишни и месечни планови. Освен редовните контроли, институцијата постапува и по пријави од граѓани и други институции.
Надлежните ги повикуваат граѓаните да пријавуваат неправилности на бесплатниот телефонски број 191 или преку официјалната веб-страница.
