Најмалку 75 пожарникари се повредени од почетокот на големиот шумски пожар што беснее во францускиот регион Жиронд, соопштија регионалните власти.
Од нив, десетмина морале да бидат евакуирани, но засега нема загинати меѓу припадниците на противпожарните и спасувачките служби.
Пожарот, кој избувна во средата во близина на Саумос, продолжил да се шири по исклучително тешката ноќ. Огнот повторно силно се разгорел во вечерните часови и станал непредвидлив, но кон крајот на ноќта ситуацијата делумно се стабилизирала.
Според надлежните, денешните временски услови се поповолни, што им овозможува на пожарникарите повторно да ги интензивираат активностите на терен и да им помогнат на евакуираните жители.
Од почетокот на пожарот превентивно се евакуирани речиси 220.000 луѓе во 23 општини, од кои 55.000 само во текот на изминатата ноќ.
Огнената стихија досега зафатила околу 42.000 хектари површина, а уништени се најмалку 240 куќи.
Во гаснењето учествуваат 2.500 пожарникари, 1.500 војници и 18 летала, а францускиот воен транспортен авион A400M повторно ќе биде вклучен во операциите за гаснење во текот на денот. Поради пожарот, делумно е затворен и автопатот A63.
