Администрацијата на американскиот претседател Доналд Трамп ќе спроведе повторна, детална проверка на сите зелени карти издадени на имигранти од 19 земји, јавува BBC. Одлуката доаѓа непосредно по вооружениот напад во Вашингтон, во кој афганистански државјанин тешко рани двајца припадници на Националната гарда.
Директорот на Службата за државјанство и имиграција на САД (USCIS), Џозеф Едлоу, соопшти дека Трамп наредил „целосна и ригорозна повторна проверка на секоја зелена карта за секој странец од секоја земја од интерес“.
Нападот го извршил 29-годишниот Рахманулах Лаканвал, кој во САД пристигнал во 2021 година преку специјален програма за заштита на Авганистанци по повлекувањето на американската армија од Авганистан. Според американските власти, тој со огнено оружје ги нападнал припадниците на Националната гарда во центарот на Вашингтон.
Трамп изјави дека случајот ја демонстрира „најголемата закана за националната безбедност“.
„Претходната администрација пушти 20 милиони непознати и непроверени странци. Ниту една земја не може да го толерира тој ризик,“ порача Трамп.
Кои земји ќе бидат опфатени?
USCIS упати на претседателскиот документ од јуни, според кој под „земји од интерес“ се наоѓаат:
Авганистан
Куба
Хаити
Иран
Сомалија
Венецуела
Други земји опфатени со ревизијата се Бурма, Чад, Република Конго, Либија и уште неколку други држави со високи безбедносни ризици или со голем број прекршувања на визниот режим.
Во документот се наведува дека Авганистан е целосно под контрола на Талибанците – група означена како глобална терористичка организација – и дека земјата не може да обезбеди валидни патни или граѓански документи.
Едлоу нагласи дека ревизијата е дел од новиот приоритет на администрацијата за национална безбедност.
„Американскиот народ нема да ги плаќа трошоците на непромислените политики за преселување на претходната администрација,“ додаде тој.
Сѐ уште не е познато како точно ќе изгледа процесот на повторната проверка, ниту дали одредени групи имигранти би можеле да го изгубат статусот.
Одлуката следи по уште една мерка од минатата недела – ревизија на статусот на сите бегалци примени во САД во периодот на администрацијата на Џо Бајден.
Администрацијата на Трамп со ова отвора нов фронт во имиграционата политика – со директни последици за илјадници имигранти кои веќе долги години живеат и работат во САД.
