Десетици милиони американски пензионери и други корисници на системот за социјално осигурување би можеле да се соочат со намалување на месечните примања веќе за шест години, доколку американските законодавци не преземат итни мерки за стабилизирање на програмата.
Според најновиот годишен извештај на поверениците на американскиот систем за социјално осигурување, клучниот пензиски фонд ќе остане без резерви до крајот на 2032 година, една година порано од претходните проценки. Во тој случај, приходите од даноците на плати и другите извори ќе бидат доволни за покривање на само 78 проценти од предвидените исплати.
Ова значи дека, доколку не се најде решение, милиони Американци би можеле да добиваат намалени пензии и надоместоци. Се очекува прашањето да стане една од главните политички теми во пресрет на претседателските избори во 2028 година.
Извештајот предупредува дека и финансиската состојба на програмата Medicare се влошува. Се проценува дека фондот за болничко осигурување ќе може да ги покрива трошоците до 2033 година, по што ќе обезбедува средства за околу 89 проценти од планираните расходи.
На крајот од 2025 година, околу 62 милиони Американци примале пензиски и семејни надоместоци, додека осум милиони лица добивале инвалидски надоместоци. Во системот Medicare биле вклучени повеќе од 69 милиони корисници.
Како причини за влошувањето на прогнозите се наведуваат стареењето на населението, подолгиот животен век, пониската стапка на наталитет, но и одредени даночни олеснувања воведени со законскиот пакет на американскиот претседател Доналд Трамп. Според експертите, тие мерки ќе доведат до помали приходи во фондовите за социјално осигурување и Medicare.
Стручната јавност повторно го повика Конгресот да реагира навреме.
„Ова треба да биде повик за будење. Конгресот мора да дејствува“, изјави Мишеја Минтер-Џордан, извршна директорка на здружението на пензионери AARP, предупредувајќи дека Американците кои со години уплаќале во системот не смеат да се соочат со намалување на заслужените примања.
