Министерот за здравство, Азир Алиу, заедно со претседателот на Владата, Христијан Мицкоски, денеска ја посетија Градската општа болница „8 Септември“ по повод завршени градежните работи за реновирање седум операциони сали со вкупна површина од 2 илјади квадратни метри. Операционите сали се наменети за повеќе различни специјалности, како што се: абдоменална хирургија, урологија, ОРЛ и очна хирургија.
„Денес зборуваме за проект кој претставува значаен исчекор во унапредувањето на здравствената инфраструктура и создавање современи услови за лекување и медицинска грижа во оваа установа. Со реализацијата на реконструкцијата и адаптацијата на оперативниот блок, интензивната нега, административниот дел, одделот за патологија, клиничката лабораторија и кровната конструкција, создаден е целосно нов, функционален и технички усогласен здравствен простор, согласно најсовремените медицински стандарди и препораки на Светската здравствена организација. Овој проект не претставува само градежна реконструкција. Тој е инвестиција во безбедноста на пациентите, во подобри услови за работа на медицинскиот персонал и во долгорочна стабилност и ефикасност на здравствениот систем, истакна министерот Алиу.
Тој истакна дека особено значајна е примената на највисоки инженерски, технички и безбедносни стандарди, со современи електро и машински системи, напреден BMS систем за централизирано управување, нови климатизациски и енергетски решенија, како и опрема од најновата генерација. Воедно, со реконструкцијата на кровот и интеграцијата на фотоволтаични панели значително се придонесува кон енергетска одржливост и рационално управување со ресурсите.
