Јосифоска тврди дека била одбиена, ФЗО одговара дека немало барање – кој одлучил дека може да се оперира во Македонија?

Фондот за здравствено осигурување (ФЗО) тврди дека 34-годишната Наталија Јосифоска, која боледува од спина бифида и која јавно проговори за проблемите со лекувањето во Македонија, воопшто не поднела барање за лекување во странство. Од Фондот велат дека поради тоа не била спроведена постапка, ниту било донесено решение со кое ѝ е одбиено лекување во Турција, како што претходно тврдеше пациентката.

Ова е одговорот што „Скопје1“ го доби од ФЗО по новинарските прашања за случајот на Јосифоска, која сведочеше дека поради ризикот да ја изгуби способноста за движење била принудена да замине на сложена операција во Турција, а трошоците ги покрила самостојно со помош на семејството.

„Според службената евиденција на Фондот, осигуреничката Н.Ј. нема поднесено барање за лекување во странство, поради што Фондот нема спроведено постапка, ниту донесено решение со кое ѝ е одбиено таквото право“, се наведува во одговорот.

Од институцијата објаснуваат дека за одобрување лекување во странство потребно е да се утврди дека се исцрпени можностите за лекување во Македонија, а постои можност за успешно лекување во друга држава. За тоа е потребно барање со медицинска документација и конзилијарно мислење потпишано од тројца специјалисти и директорот на соодветната универзитетска клиника.

— реклама —

Во однос на прашањето кој проценил дека сложената операција може да се изведе во Македонија, Фондот соопштува дека побарал дополнителни информации од Универзитетската клиника за неврохирургија.

„Според известувањето од Клиниката, на осигуреничката ѝ било посочено дека хируршкиот зафат може да се изведе во оваа здравствена установа“, одговараат од ФЗО.

Сепак, од Фондот не наведуваат кои лекари ја донеле таквата проценка, колку идентични операции биле извршени во земјава и каков бил нивниот исход. Посочуваат дека овие прашања се во надлежност на Клиниката за неврохирургија, додека индивидуалната медицинска документација не може јавно да се објавува без соодветна правна основа.

— реклама —

Јосифоска претходно тврдеше дека лекарите од Клиничкиот центар ѝ кажале дека можат да ја оперираат, иако, според нејзиното сведоштво, други лекари ја советувале зафатот да го направи во Турција поради сложеноста и ризиците. Таа изјави и дека комисија проценила дека операцијата може да се изведе во Македонија. ФЗО, пак, наведува дека пред неговата лекарска комисија воопшто не била поведена постапка за одобрување лекување во странство.

Различни се и наводите околу постоперативната рехабилитација. Пациентката тврди дека не можела да добие 30-дневна рехабилитација на товар на Фондот и дека е принудена приватно да плаќа физикална терапија, која ѝ е неопходна по операцијата.

Од ФЗО одговараат дека во нивната службена евиденција нема поднесено барање за продолжено болничко лекување.

„Осигуреничката Н.Ј. нема поднесено барање за продолжено болничко лекување, поради што Фондот нема донесено решение со кое ѝ е одбиено ова право“, наведуваат од институцијата.

— реклама —

Дополнително појаснуваат дека продолженото болничко лекување и амбулантската физикална терапија се различни здравствени услуги, за кои важат посебни услови и постапки.

На прашањето дали постои можност Јосифоска да ги добие назад парите што ги потрошила за операцијата во Турција, од Фондот одговараат дека лекување во странство извршено по сопствена иницијатива, без претходна постапка и решение од ФЗО, не претставува основ за рефундирање на трошоците според прописите што го уредуваат ова право.

„На 34 години ќе ме оставевте во количка“ – пациентка од Скопје со обвинувања кон здравствениот систем

Триесет и четиригодишната Наталија Јосифоска, која е родена со спина бифида, јавно проговори за долгогодишната борба со здравствениот систем, одбивањето на Фондот за здравствено осигурување да ѝ покрие операција во странство и проблемите со кои се соочува по сложениот хируршки зафат што го направила во Турција. Таа тврди дека, иако македонските лекари уверувале дека можат да ја оперираат, сега се соочува со неизвесност дали воопшто има стручно лице кое може да ги прочита нејзините снимки од магн

Коментари | пред 2 дена

За евентуално покривање на трошоците за рехабилитација, Фондот наведува дека правата се разгледуваат според условите предвидени за конкретната здравствена услуга.

Во претходното сведоштво, Јосифоска посочи и дека при контролно снимање со магнетна резонанца ѝ било кажано дека не се знае кога ќе има стручно лице кое ќе може да ги протолкува снимките. Ова прашање не е конкретно разјаснето во доставениот одговор од ФЗО.

Од Фондот изразуваат разбирање за здравствените предизвици со кои се соочува пациентката, но нагласуваат дека правата од задолжителното здравствено осигурување се остваруваат според законски утврдени процедури кои важат за сите осигуреници.

Со одговорот на ФЗО останува отворено прашањето за разликата меѓу сведоштвото на Јосифоска, која тврди дека била одбиена за лекување во странство, и службената евиденција на Фондот, според која формално барање воопшто не било поднесено. Исто така, сè уште нема конкретен одговор од Клиниката за неврохирургија за медицинските докази врз основа на кои било оценето дека операцијата може да се изведе во Македонија.