Една година донираниот апарат за хемодијализа на Детска клиника не е ставен во уптореба, а децата и натаму се носат во странство

Една година откако беше најавено дека децата со тешки бубрежни заболувања ќе можат да добиваат хемодијализа на Клиниката за детски болести во Скопје, донираниот апарат сè уште не е ставен во употреба. Иако апаратот е обезбеден, а лекар од Клиниката поминал обука во странство, процедурата сè уште не е воведена, потврдуваат од Клиниката во одговор за „Скопје1“.

Пред точно една година, бизнисменот, кој е и градоначалник на Кавадарци, Митко Јанчев во гостување во „Претрес со Ландов“ најави дека апаратот, набавен преку Фондацијата „Никола Јанчев“, ќе започне да се користи по изборите, односно од 15 ноември.

„Станува збор за апарат за хемодијализа којшто не е пуштен во употреба. Ќе го пуштиме после изборите. Не сакаме сега да го пуштиме, да не се разбере дека е изборна пропаганда“, изјави тогаш Јанчев.

— реклама —

Тој објасни дека со донацијата треба да се овозможи третман и на деца со телесна тежина под 10 килограми, кои дотогаш, според неговите зборови, при акутни бубрежни проблеми морале итно да бидат транспортирани во Белград.

Јанчев наведе дека компанијата „Кожувчанка“, преку Фондацијата „Никола Јанчев“, обезбедила 50.000 евра за набавка на апаратот, додека еден сет за хемодијализа чини околу 6.000 евра. Според неговата тогашна изјава, лекувањето на вакви пациенти во странство претставувало значителен трошок и за Фондот за здравствено осигурување и за семејствата.

Но, една година подоцна, апаратот сè уште не се користи за лекување пациенти.

— реклама —

Од Универзитетската клиника за детски болести, во одговор за „Скопје1“, објаснуваат дека воведувањето хемодијализа е сложена процедура што бара исполнување повеќе технички, кадровски, просторни и административни предуслови.

„Откако преку донација го добивме апаратот, покрај едукацијата во странство на докторот од нашата Клиника кој е носител на дејноста, спроведовме неколку едукации на самиот апарат во рамките на нашата Клиника на тимот од доктори и сестри кои ќе бидат вклучени во изведување на процедурата“, наведуваат од Клиниката.

Според нив, биле потребни месеци за административните постапки, контролите од соодветни комисии на Министерството за здравство и останатите процедури поврзани со добивањето дозвола за новата здравствена услуга.

— реклама —

Сепак, и по поминатите обуки, подготовките не се завршени. Од Клиниката велат дека едукацијата на лекарите и медицинските сестри продолжува, а сè уште трае и координацијата со специјалистите од другите клиники што треба да бидат вклучени во лекувањето.

„Во тек се финалните координации со сите специјалности од нашата Клиника и другите клиники кои ќе бидат вклучени во имплементацијата на оваа процедура и се надеваме дека во скоро време ќе бидеме потполно подготвени“, посочуваат од Детската клиника.

Од установата не наведуваат конкретен датум кога ќе биде извршена првата хемодијализа на донираниот апарат.

— реклама —

Според податоците што ги доставија до „Скопје1“, годишно имале најмалку четири до шест деца со акутна бубрежна слабост и потесни медицински индикации за ваков третман. Со воведувањето на процедурата, очекуваат да можат да лекуваат и деца со други состојби за кои е потребна хемодијализа.

Клиниката посочува дека ваква процедура би се вовела за првпат во нејзиното 40-годишно работење.

И покрај обезбедената донација, обуката на лекар во странство и дополнителните едукации на медицинскиот персонал, останува неодговорено кога апаратот конечно ќе почне да се користи за децата на кои им е потребен ваков третман.