ФЗО за барањето на Паскалов: Децата имаат право на магнетна резонанца и компјутерска томографија без приватно плаќање

Децата имаат право на компјутерска томографија и магнетна резонанца на товар на Фондот за здравствено осигурување, доколку постои медицинска потреба и испитувањето е побарано преку пропишаната постапка. Родителите не мора да ги плаќаат овие испитувања по приватни цени само затоа што лекарот кај кого го прегледале детето нема овластување да издаде соодветен упат, појаснуваат од ФЗО за „Скопје1“.

Одговорот следува по јавното барање на детскиот невролог Гого Паскалов, кој побара институциите да најдат решение со кое ќе може од својата ординација да упатува деца на компјутерска томографија и магнетна резонанца на мозокот, а трошоците да бидат покриени од здравственото осигурување.

Од Фондот објаснуваат дека ординацијата на Паскалов, според решението издадено од Министерството за здравство, е регистрирана за вршење здравствена дејност на примарно ниво. Врз таа основа е склучен и договорот со ФЗО, со кој се определени услугите што ординацијата може да ги обезбедува.

— реклама —

„Лекарот што има дополнителна специјализација не значи дека неговата ординација автоматски ги добива овластувањата што им припаѓаат на здравствените установи од другите нивоа на здравствена заштита. Овластувањата за упатување се утврдени со прописите и важат еднакво за сите лекари и здравствени установи“, наведуваат од ФЗО.

Според објаснувањето на Фондот, член 60 од Правилникот за остварување на правата од задолжителното здравствено осигурување предвидува избраниот лекар да упатува на радиодијагностички испитувања со упат РДУ1, додека за посложени испитувања, како компјутерска томографија и магнетна резонанца, потребен е упат РДУ2, кој го издава лекар специјалист или супспецијалист од соодветната дејност.

— реклама —

„Сакам за децата сè да биде бесплатно“ – детски невролог кој работи во свој ординација бара решение од Фондот

Детскиот невролог Гого Паскалов јавно побара од Фондот за здравствено осигурување и Лекарската комора да најдат решение со кое ќе може да упатува деца на компјутерска томографија и магнетна резонанца на мозокот, а трошоците за испитувањата да бидат покриени од Фондот.Паскалов, кој наведува дека е првиот детски невролог во Македонија што работи во сопствена ординација, наместо во болница, вели дека не му е јасно зошто надлежните институции досега не успеале да постигнат договор за ова прашање.„Не

Коментари | пред 2 дена

Тоа, според ФЗО, значи дека доколку детето има медицинска потреба од вакво снимање, избраниот лекар треба да го упати кај соодветен специјалист, кој по проценката може да издаде упат за испитувањето на товар на Фондот.

„Тоа во никој случај не значи ограничување на правата на децата. Доколку постои медицинска потреба од КТ или МР, избраниот лекар го упатува детето кај лекар специјалист, односно супспецијалист од соодветната дејност, кој врз основа на медицинската проценка и утврдените индикации може да издаде упат РДУ2“, посочуваат од институцијата.

— реклама —

Од ФЗО дополнително нагласуваат дека правилата за упатување се воспоставени и поради безбедноста на пациентите. Компјутерската томографија подразбира изложување на јонизирачко зрачење, додека магнетната резонанца, иако не користи такво зрачење, кај помалите деца понекогаш бара седација или анестезија.

Паскалов претходно јавно реагираше дека, иако во својата ординација врши ехографски прегледи, нема можност директно да издава упати за компјутерска томографија и магнетна резонанца на товар на Фондот.

„Сакам да назначувам компјутер и магнет на мозок кога сакам и да е под Фондот. Ехо секако правам“, напиша Паскалов, додавајќи дека неговата цел е децата да ги добиваат потребните испитувања без дополнителни трошоци за родителите.

Од Фондот остануваат на ставот дека правото на дијагностика е обезбедено, но дека лекарите мора да постапуваат во рамките на овластувањата што ги имаат здравствените установи во кои работат.

Со ваквиот одговор ФЗО појаснува дека не постои пречка децата да добијат снимање на товар на здравственото осигурување, но не најавува промена на правилата што би му овозможила на Паскалов директно да издава упати за овие испитувања од неговата ординација.