Американскиот претседател Доналд Трамп соопшти дека американските сили извеле операција во која бил убиен Хектор Рустенфорд Гереро Флорес, познат како Нино Гереро, водач на венецуелската затворска банда „Трен де Арагуа“.
Во објава на својата социјална мрежа Truth Social, Трамп наведе дека акцијата била спроведена по негова наредба.
„Според моите инструкции, Јужната команда на САД изведе брз и смртоносен удар со кој успешно беше елиминиран Нино Гереро, озлогласениот лидер на Трен де Арагуа, една од најкрвожедните терористички организации на планетата“, напиша Трамп.
Тој додаде дека операцијата била тесно координирана со венецуелските власти.
„Акцијата беше тесно координирана со нашите пријатели во Венецуела, со кои имаме многу добра соработка“, посочи американскиот претседател.
Трамп не откри каде точно е извршена операцијата, а од венецуелското Министерство за информации засега нема официјална реакција.
Администрацијата на Трамп претходно воведе повеќе санкции против Гереро и други лидери на „Трен де Арагуа“, поради сомнежи за вмешаност во трговија со дрога, криумчарење луѓе и перење пари.
Американскиот Стејт департмент ја класифицираше организацијата како странска терористичка организација, додека Белата куќа, Пентагон и Јужната команда на САД засега не објавија дополнителни детали за операцијата.
Трамп и претходно тврдеше дека „Трен де Арагуа“ делува во координација со владата на венецуелскиот претседател Николас Мадуро, а таа оценка неговата администрација ја користеше како аргумент за депортација на дел од мигрантите од САД во затвори во Ел Салвадор.
